Cefndir yr Her
Mae cyfle cyffrous i weithio gydag Ymddiriedolaeth GIG Gwasanaethau Ambiwlans Cymru (WAST) a Byrddau Iechyd yng Nghymru i leihau’r galw digynsail ar ambiwlansys a gwasanaethau Gofal Brys a Gofal mewn Argyfwng ledled Cymru. Mae ein cleifion yn aros yn hirach nag y dylent am ymateb ambiwlans a phan fyddant yn cyrraedd yr ysbyty (Adran Achosion Brys), gallant dreulio cryn dipyn o amser yn yr ambiwlans cyn cael eu trosglwyddo i dimau clinigol yr Adran Achosion Brys.
Hoffem allu trawsnewid y ffordd y mae gofal brys a gofal mewn argyfwng yn cael ei ddarparu, gan geisio cefnogi uchelgais strategol WAST i ofalu am fwy o gleifion yn eu cartrefi eu hunain neu mewn lleoliad cymunedol, gan leihau’n ddiogel nifer y cleifion sydd angen eu cludo i’r ysbyty.
Mae cyfle i wella seilwaith WAST er mwyn ein galluogi i ddarparu gofal yn nes at y cartref. Mae WAST yn ‘uwch-gysylltydd’ ar draws lleoliadau iechyd a gofal gyda chynlluniau uchelgeisiol i drawsnewid eu model darparu gwasanaeth i wella canlyniadau clinigol, gwella profiad cleifion a lleddfu ‘pwysau system’ ar wasanaethau Gofal Brys a Gofal mewn Argyfwng. Er mwyn gwneud hyn, mae’n bwysig rhoi’r offer a’r dechnoleg gywir i’n pobl er mwyn galluogi rhoi ‘gofal iawn yn y lle iawn’.
Manylion yr her
Hoffem wahodd diwydiant i’n galluogi i ddarparu gofal yn nes at y cartref. Rydym yn chwilio am ddatrysiadau arloesol i wella un (neu fwy) o’r themâu:
- Gwella galluoedd mewn lleoliadau cyn-ysbyty sy’n gallu galluogi cleifion i dderbyn gofal yn nes at adref. Gallai hyn gynnwys Profion Pwynt Gofal (e.e. profion gwaed gyda chanlyniadau cyflym), datrysiadau technoleg gwisgadwy ac offer sganio symudol;
- Defnyddio technoleg i gefnogi gofal cleifion, gwella cyfathrebu a gwella diogelwch cleifion yn ystod diagnosis cychwynnol neu mewn achosion o arosiadau cymunedol hir am ambiwlans neu ymateb 111, neu aros am apwyntiad brys mewn man gofal diffiniol.
Rydym yn chwilio am ddatrysiadau a fydd yn darparu effaith lefel uchel, bositif i boblogaeth Cymru. Yn benodol, mae’r galw am wasanaethau ambiwlans/gofal brys a gofal mewn argyfwng yn uchel ar gyfer:
- Pobl sydd wedi cael codwm – Cleifion sydd wedi bod ar y llawr am gyfnod sylweddol o amser (gorwedd am gyfnod hir);
- Pobl sy’n profi problemau anadlol – yn enwedig cyflyrau cronig sy’n dirywio’n ddifrifol;
- Pobl sy’n profi poen yn y frest – lle na ellir cadarnhau natur y boen ar hyn o bryd yn y lleoliad cyn-ysbyty.
Mae yna lawer o ddatrysiadau diagnostig ar gael. Nod yr her hon yw dod â datrysiadau ynghyd i ddatblygu datrysiad sector ambiwlans i’w ddefnyddio yn yr amgylchedd cyn-ysbyty.
Rydym am nodi, datblygu ac arddangos technoleg ac offer a allai:
- Bod yn addas ar gyfer defnydd symudol (defnydd cyn-ysbyty);
- Ffitio i’r seilwaith presennol a bod modd ei ddefnyddio ar draws mathau gwahanol o gerbydau;
- Defnyddio deallusrwydd artiffisial, technoleg estynedig a/neu brosesu iaith naturiol i wella systemau a phrosesau cyfredol;
- Bod yn addas i’w ddefnyddio ar gyfer pob math o weithwyr proffesiynol clinigol cyn-ysbyty/personél ymateb;
- Cefnogi defnydd priodol o ambiwlansys gan y gymuned;
- Meithrin cydnerthedd cymunedol i gefnogi cleifion gartref yn ystod cyfnod o angen gofal brys/argyfwng;
- Galluogi gwneud penderfyniadau a darparu gofal yn nes at y cartref;
- Cefnogi bywyd annibynnol parhaus cleifion;
- Ategu ac annog cefnogaeth gymunedol;
- Bod yn gynaliadwy ac yn fforddiadwy i’r sector cyhoeddus a’r claf.
Allan o Sgôp:
- Amnewid cerbydau;
- Integreiddio i unrhyw systemau cenedlaethol.
Strwythur Camau’r Her
Cam 1: Datblygiad – O gyfanswm o £225,000, disgwyliwn ariannu hyd at 3 phrosiect hyd at werth o £75,000 (gan gynnwys TAW) yr un.
Sylwer: Dim ond prosiectau sy’n llwyddiannus yng ngham 1 fydd yn gymwys i ymgeisio am gamau 2 a 3
Cam 2: Profi – Bydd y Cam hwn yn golygu cynnal prawf cadarn mewn amgylchedd bywyd go iawn ar gyfer hyd at 3 o’r datrysiadau Cam 1 llwyddiannus o gyfanswm cronfa o hyd at £800,000. Disgwyliwn ariannu hyd at 3 phrosiect hyd at £265,000 (gan gynnwys TAW) yr un.
Wrth wneud cais i’r gystadleuaeth Cam 1 hon, rydych yn cymryd rhan mewn proses gystadleuol. Sylwer y byddai angen ymarfer caffael ar wahân, a chystadeuol o bosibl, cyn y gellid mabwysiadu a gweithredu datrysiad. Nid yw’r gystadleuaeth hon yn cynnwys prynu unrhyw ddatrysiad er y byddwn yn ymchwilio ac yn archwilio llwybrau caffael arloesol fel rhan o’r her hon, pe bai datrysiad llwyddiannus yn dod i’r amlwg.
Gallai cyfanswm y cyllid sydd ar gael ar gyfer y gystadleuaeth newid. Mae gan y cyllidwyr hawl i:
- addasu’r dyraniadau cyllid dros dro rhwng y camau;
- defnyddio dull ‘portffolio’;
- ariannu Cam 3 i ganiatáu profi’r datrysiadau datblygedig yn fwy trylwyr.
Tabl Dyddiadau Allweddol:
| Gweithgarwch Cam 1 | Dyddiadau Allweddol – **gallai’r rhain newid** |
| Dyddiad Cychwyn – Cam 1 | 31/01/2023 |
| Digwyddiad briffio | 23/02/2023 |
| Dyddiad Terfynu | 17/03/2023
12:00 y prynhawn |
| Hysbysu Ymgeiswyr | 24/03/2023 |
| Dyfarnu Contractau Cam 1 | 24/03/2023 |
| Adborth | Ebrill 2023 |
| Prosiectau yn Cychwyn | 03/04/2023 |
| Cwblhau Prosiectau | 19/06/2023 |
| Gweithgarwch Cam 2 | Dyddiadau Allweddol – **gallai’r rhain newid** |
| Adolygu ceisiadau Cam 2 a gwneud penderfyniad ynghylch cwmni/cwmnïau i fwrw ymlaen â hwy | Mehefin/Gorffennaf 2023 |
| Rhoi adborth i ymgeiswyr aflwyddiannus | Mehefin/Gorffennaf 2023 |
| Llofnodi’r contractau a’u cychwyn | Mehefin/Gorffennaf 2023 |
| Diwedd y prosiect | Ebrill 2024 |
Digwyddiad Briffio
Dilynwch y ddolen isod i fynegi eich diddordeb yn y Digwyddiad Briffio rhithiol a gynhelir ar 23/11/2023.
Hysbysiad ynghylch Cynllun Masnachol
Sylwer, os byddwch yn llwyddiannus yng Ngham 1 ac yn symud ymlaen i Gam 2, bydd angen i chi ddarparu cynllun/strategaeth masnacheiddio fel rhan o ddeilliannau eich contract.
Rhagor o wybodaeth
I gael rhagor o wybodaeth am y gystadleuaeth hon, ewch i:
Newid y Ffordd yr Ydym yn Darparu Gofal mewn Argyfwng
Os oes gennych unrhyw ymholiadau ynghylch y gystadleuaeth hon, e-bostiwch: [email protected]
Mae’r gystadleuaeth hon wedi dod i ben.